Почитувани, Пред Вас е првиот електронски билтен, наменет за Вас, дипломираните студенти на факултетите и академиите на Универзитетот „Гоце Делчев“ – Штип. Ова е дел од вкупните процеси за формирање на „Алумни клуб“ , во кој се поканети сите дипломирани студенти од прв, втор и трет циклус на студии на УГД. Електронскиот билтен е само една од формите преку кои до Вас ќе стигнуваат информациите за настаните кои се случуваат на Универзитетот, за постигнувањата на Ваши колеги кои направиле кариера, постигнале успеси. Ова секако е во насока на овозможување на контакти кои би ги зголемиле и Вашите можности за креирање на сопствена успешна приказна. За таа цел, дел од овој билтен секогаш ќе бидат и конкурси и огласи за работа кои исто така ќе бидат поставувани и на веб страницата на „Алумни клубот“. Идејата на „Алумни клубот“, покрај споделување на информации и од Ваша страна, е и да можете да комуницирате помеѓу себе во мрежата на овој клуб, што дава дополнителни предности. Членовите на „Алумни клубот“ кои студираат на втор или на трет циклус на студии преку мрежата на „Алумни клубот“ ќе можат да стапат во контакт со други алумни кои може да им помогнат во нивните истражувања или да им овозможат поддршка и можност за посетување практична работа во нивните компании или институции. И обратно, членовите на „Алумни клубот“ кои имаат стручно знаење од одредена област може да им ги понудат своите услуги на другите членови на Клубот. Првиот чекор за заживување на оваа идеја е секако зачленувањето на што поголем број на дипломирани студенти на УГД во „Алумни клуб“, со што можностите, интензитетот на размена на информации, контактите се секако многу поголеми. Се надеваме дека ќе сакате да бидете член на „Алумни клубот“ за да ги уживате сите придобивки од оваа иницијатива и да го задржите контактот со Вашиот Универзитет и со Вашите колеги. |
